Қоғамдағы қауіпті кеселдердің бірі – ол лудомания, яғни құмарпаздық болып тұр. Шын мәнінде, лудомания – бейбіт күнде елдің шырқын бұзып жатқан қатер. Соның кесірінен талай шаңырақ шайқалды. Талай азамат заң бұзып, қылмысқа ұрынды. Құмар ойын үшін қарызға батып, өзіне қол жұмсаған жандар туралы хабарлар, өкінішке орай, күн сайын тарап жатады. Бұл дерт жас ұрпаққа өте үлкен зиян келтіреді. Онлайн-ойындар балалардың күнделікті ермегіне айналып барады. Осыған орай, 2024 жылғы 8 шілдеде Мемлекет басшысы Қ.Тоқаев ойын бизнесіне қатысты бірқатар Заңдарға өзгерістер енгізу туралы Заңға қол қойды. Аталған өзгерістер халықтың ойын құмарлығын төмендетуге бағытталған шектеулер мен ыңталдандыру шараларын қамтиды. Құмар ойындарына қатысуға тиым салынған тұлғалардың тізімі кеңейтілді.
Соның ішінде, мемлекеттік қызметшілерге де құмар ойындарына қатысуға қатаң тиым салынды. Ол үшін, Сыбайлас жемқорлыққа қарсы әс-қимыл туралы ҚР Заңына да өзгерістер енгізіліп, 12-бабындағы Сыбайлас жемқорлыққа қарсы шектеулер тізімі толықтырылып, 2024 жылдың 9 қыркүйегінен бастап күшіне енді. Яғни, келесі мазмұндағы 6) тармақ енгізілді «Ойын бизнесі туралы» Қазақстан Республикасының Заңында көзделген анықтамаға жататын ойын мекемелерінде құмар ойындарға және (немесе) бәс тігуге қатысу, сол сияқты құмар ойындарға және (немесе) бәс тігуге сол үшін бөлінбеген орындарда қатысу немесе телекоммуникация желілерін, оның ішінде Интернет желісін пайдалану арқылы өткізілетін құмар ойындарға және (немесе) бәс тігуге қатысу бойынша сыбайлас жемқорлыққа қарсы шектеулерді қабылдайды.».
Осылайша, алдағы уақытта қызметкер құмар ойындарға қатысып немесе бәс тіккен жағдайда, ол жұмыстан теріс себептермен шығарылатын болады.
Е.ӨЗБЕКОВ,
Шымкент қаласы бойынша
Мемлекеттік кіірістер департаменті
басшысының орынбасары.
