Президент Қасым-Жомарт Тоқаев мопед жүргізушілеріне жүргізуші куәлігін талап ететін заңға қол қойды. Атап айтқанда, Мемлекет басшысы «Қазақстан Республикасының кейбір көлік түрлерінің қозғалысын реттеу және жол қауіпсіздігін цифрландыру мәселелері бойынша заңдарына өзгерістер мен толықтырулар енгізу туралы» заңды мақұлдады.
Мопед жүргізушілері енді міндетті түрде мемлекеттік тіркеуден өтіп, жүргізуші куәлігін алуға міндетті. Оларға 3 қазаннан бастап алты ай уақыт беріледі. Бұл мерзімнен кейін талаптарды орындамаған жағдайда, мопедтері айыптұраққа қойылады. Сонымен қатар, мопедтер тіркеліп, иелері міндетті түрде «А» санатындағы жүргізуші куәлігін алуы қажет.
Сонымен қатар, жаңа заңға сәйкес, алкогольдік немесе есірткілік мас күйінде көлік жүргізгені үшін жазаланған, бірақ жүргізуші куәлігі жоқ адамдар жеті-сегіз жыл бойы емтихан тапсыра алмайды. Заңда сондай-ақ «орташа жылдамдық» ұғымы енгізілді, оны сертификатталған автоматты құрылғылар анықтайды. Билік бұл өзгеріс жылдамдықты шектен асырудың салдарынан болатын жол апаттарын азайтуға ықпал етеді деп сенеді.
Мопед, электрсамокат және велосипед жүргізушілердің:
1) ең болмағанда бір қолымен рульден ұстамай жүргізуге;
2) жолаушыларды тасымалдауға арналған арнаулы бейімдемелері бар велосипедтермен және мопедтермен тасымалдаудан басқа, жолаушыларды тасымалдауына;
3) тасымалдауға арналған арнаулы бейімдемелері бар велосипедтермен және мопедтермен жүкті, сондай-ақ габаритінен ұзындығы немесе ені елу сантиметрден артық шығып тұрмайтын жүкті тасымалдаудан басқа, жүкті немесе басқаруға кедергі келтіретін жүкті тасымалдауына;
4) трамвай жүретін жолдарда және осы бағытта жүруге арналған біреуден астам жолағы бар жолдарда солға бұрылуына немесе кері бұрылуына;
5) мопедпен және велосипедпен пайдалануға арналған тіркемені сүйретуден басқа, мопедтерді, электр самокаттарды және велосипедтерді, сондай-ақ мопедтермен, электр самокаттармен және велосипедтермен сүйретуіне;
6) көлік құралынан түспей, жаяу жүргіншілер өткелімен жолдың жүру бөлігін кесіп өтуіне;
7) жол жүрісі қағидаларында айқындалған талаптарға сәйкес келетін, басқа көлік құралын жүргізушілерге көрінуді қамтамасыз ететін жарық шағылыстыратын затсыз жолдың жүру бөлігінде тәуліктің қараңғы уақытында жүріп-тұруына;
8) жолдың жүру бөлігінде басқаруы кезінде түймеленген шлемсіз болуына тыйым салынады.
Президент «Әкімшілік құқық бұзушылық туралы кодекске» де осы бағыттағы өзгерістер мен толықтыруларды енгізуді мақұлдады. Бұл өзгерістер көлік құралдарының қозғалысын реттеуді жақсарту және жол қозғалысы қауіпсіздігін арттыру үшін цифрлық технологияларды енгізуге бағытталған.
Әл-Фараби ауданы прокуратурасы.
