Мемлекетімізде жас ұрпаққа ерекше көңіл бөлініп, олардың еркін де рухты, білімді де тәрбиелі, еңбекшіл де отаншыл болып өсуіне жан-жақты жағдай жасалып келеді. Мемлекет тарапынан балалардың қауіпсіздігіне, қорғалып, қолдау жасалуына байланысты жасалып жатқан жұмыстар мен әр жеткіншектің бұла болып, арманшы болып есеюі үшін олардың кішкентай кезінен түрлі салалармен таныс болып, мектеп пен үйде қоршаған ортаға бейімделіп, еңбек пен өнерді өздеріне өнее етіп өсуіне мүмкіндік бар.
Түркістан облысында еңбексүйгіш, өнерлі де шебер, көптеген салалар бойынша өздерінің дарындарын ашып, танымал болып, жетістіктере жетіп келе жатқан жеткіншектер де көп. Солардың қатарында домбыра, қобыз, басқа да ағаштан жасалатын бұйымдарды өз қолымен жасап жүрген түркістандық 14 жастағы оқушы қыз да бар.
Келес ауданы N47 Д.Қонаев атындағы жалпы білім беретін мектебінің 9-сынып оқушысы Кәусар Сүндетқұл жас кезінен еңбекқор. Көп балалы өнерлі отбасында өсіп жатқан Кәусар атасына көмектесіп домбыра, қобыз, ұлттық жәдігерлер мен қолөнер бұйымдарын жасайды.
– Менің атам 20 жылдан бері қолөнермен айналысады. Атамның кішкентай кезінен қасында жүріп, жасаған заттарына ұлттық оюды бедерлеп, кейде өзім де түрлі бұйымдар жасаймын. Маған бұл қатты ұнайды. Сабақтан кейін үйге қарай асығамын, бос уақытымды тиімді өткізгім келеді. Мектепте көркем еңбек пәні қатты қызықтырады, – дейді талантты оқушы.
Атасы мен немересінің жасаған қолөнер бұйымдары, домбыралары түрлі көрмелерге қойылған. Ауыл тұрғындары арасында да сұранысқа ие. Жас шәкірттің өзі оқуда озат, түрлі деңгейдегі байқауларда жеңіс тұғырынан көрініп келеді
