Мемлекет тарапынан отбасылық құндылықтарды нығайту және демографиялық саясаттарды жүзеге асыруға көп көңіл бөлініп отыр. Отбасылық құндықытарды нығайту мен бала туудың көрсеткішін көтеру үшін мемлекет көптеген жеңілдіктер жасап, өтемақы, төлемақылар төлеп, аз қамтылған, көпбалалы отбасыларға қолдау жасауда. Елімізде ана мен баланың қауіпсіздігін қорғау мен оларды жан-жақты қолдау бойынша да түрлі бағдарлама мен жобалар іске асырылуда. Осының барлығының арқасында елімізде отбасылардың шаңырағының шайқалуы азайып, туылған сәбилер саны артып келеді. Республика бойынша халқының саны көп аймақтың бірі ретінде Түркістан облысында жыл сайын дүниеге келіп жатқан сәбилердің саны ел бойынша ең жоғары деңгейде. Онымен бірге облыста егіз және үшем босанушы аналар қатары да жыл санап артып келе жатыр.
Бәйдібек ауданы әкімдігінің мәжіліс залында ауданымыздың көпбалалы, алтын құрсақты аналары марапатталды. Қазақстан Республикасы Президентінің Жарлығымен марапатқа ие болған 33 ананың 8-і алтын, 25-і күміс алқа иегері.
— «Құрметті Алтын құрсақты аналар! Сіздерге әрқашан құрметтің жоғалмайтынын, еліміздегі ана мен баланы қорғауда мемлекет тарапынан түрлі қамқорлықтар жасалынып жатқанын білесіздер. Баланы дүниеге әкеліп, оны өсіріп, бағып, елдің азаматы етіп тәрбиелеп отырғандарыңыз үшін Сіздерге шынайы алғысымды білдіремін. Әрқайсыларыңыздың отбасыларыңызға амандық тілеймін» — деп, құттықтау лебізін жеткізген аудан әкімі Ерлан Нұрмаханов марапат иелеріне алқаларын табыс етті.
Ал, Ордабасы ауданының білім бөліміне қарасты Ө.Тұрманжанов атындағы жалпы білім беретін мектебінде 2024-2025 оқу жылында 1 сыныпқа 4 жұп егіз бала мектеп табалдырығын аттады. Бұл егіздердің барлығы да көпбалалы отбасыларында дүниеге келіп, тәрбиеленіп келе жатқан жеткіншектер.
Аталған білім ошағының 1-а сыныбына барған Серікбай Амина, Серікбай Алинаның ата-анасы 7 баланы тәрбиелеп отырған қарапайым отбасы. Анасы жұмыссыз. Әкесі жеке жер кәсібімен айналысады. Ал 1-ә сыныбындағы Нұрғали Ақарыс пен Нұрғали Бекарыстың отбасында алты бала тәрбиленуде. Әкесі әкімшілікте қарауыл қызметінде, ал анасы үй шаруасындағы әйел.
Сәрсен Нұрдәулет пен Сәрсен Бақдәулеттің отбасында 4 бала тәрбиеленуде. Егіздердің бірі Асқар Аяна мен Аяла. Бұл отбасыда 6 қыз 1 ұл тәрбиеленуде. Анасы Жаңабекова Баян ауылдық кітапханада меңгеруші болып жұмыс жасайды. Әкесі жеке жер кәсібімен айналысады.