Қазақстан Республикасының жан-жақты қарқынды дамуына қол жеткізу үшін инновациялық, электроникалық, цифрландыру сияқты озық технологияларды еліміздің барлық аймағына енгізу қажет. Мемлекет басшысының тапсырмасына сай қала мен ауылдың арасындағы айырмашылықты барлық жағынан азайтып, ауыл тұрғындарының өркениеттің барлық жетістіктерін еркін пайдалануын қамтамасыз ету үшін көптеген мемлекеттік бағдарламалар мен жобалар қабылдануда. Солардың арасында ауылды аймақтарды сапалы интернеттік жүйеге қосу бойынша жоба да бар.
«Қолжетімді интернет» ұлттық жобасы аясында Түркістан облысына қарасты елді мекендерді жоғары жылдамдықты интернетпен қамту мақсатында жол картасы әзірленген. Осы ретте облыстық Цифрландыру, мемлекеттік қызметтер көрсету және архивтер басқармасының ықпалымен өңірде интернет сапасын жақсарту және интернет базалық станциясын орнату жұмыстары жүргізілуде.
— 2024 жылға байланыс операторлары өз қаражаты есебінен 132 елдімекенде базалық станция орнату жоспарланған. Қазіргі таңда 21 шалғай елдімекенде интернет базасы іске қосылды. Қалған 111 елдімекенге антенна-мачталық құрылыс жайлары салынып, интернет базасы орнатылды. Жыл соңына дейін оларды толық іске қосу жоспарлануда. Ал мемлекеттік бюджет есебінен қосымша 66 ауылдық елдімекенде антенна-мачталық құрылыс жайлары салынуда, — деді басқарма басшысы Марат Айнабеков.
Сондай-ақ жыл басынан бері Бәйдібек ауданы, Қазығұрт ауданы, Мақтаарал ауданы, Жетісай ауданы, Ордабасы ауданы, Сайрам ауданы, сол сияқтыТөлеби, Түлкібас, Сауран аудандарындағы шалғай ауылдарға интернет базалары орнатылды.
Айта кетейік, Түркістан облысының барлық аумағын сапалы да қолжетімді интернет желілерімен қамтамасыз ету мақсатындағы «Қолжетімді интернет» ұлттық жобасы бойынша атқарылатын жұмыстар 2024 жылдан бастап 2027 жылға дейін жалғасады.
