Мемлекет өзінің болашағы жарқын болуы үшін халқының рухани-мәдени деңгейін көтеріп, ұлттық және отаншылдық қасиеттерін қалыптастыруға тырысады. Өйткені отаншыл азаматтар елінің дамуына белсенді үлес қосып, рухты жастары отан қорғауға әркез дайын болады. Сондықтан да Түркістан облысының басшылығы өнер, салт-дәстүр, әдет-ғұрып пен ұлттық спорт түрлерін жаңғыртып, насихаттап, жас ұрпақтың бойына сіңіре отырып отаншылдық қасиеттерді сіңіруді мақсат етіп өнер фестивалін ұйымдастыруды қолға алған. Бұл дәстүрге айналып келе жатқан облыстық «Өнерлі өлке» өнер фестивалі Түркістан қаласының төрінде биыл екінші рет өткізіліп отыр.
Түркістан облысы әкімдігінің қолдауымен өткізіліп отырған «Өнерлі өлке» өнер фестивалі ұлттық мәдениетімізді, мәдени демалыс қызметін және халық шығармашылығын дамыту, жастар арасында ұлттық салт-дәстүр мен әдет-ғұрыпымызды дәріптей отырып, келешек ұрпақты салауатты өмір салтына бейімдеу және облысымыздың туристік әлеуетін дамыту мақсатында жыл сайын ұйымдастырылып келеді. Түркістан қаласында «Өнерлі өлке» облыстық өнер фестивалі аясында Сауран ауданының мәдениет күндері екі күнге жалғасып, өз мәресіне жетті.
Алғашқы күні «Этноауыл» аумағында аудан қолөнершілерінің көрмелері, ұлттық ойын-сауық және салт-дәстүр, әдет-ғұрып көріністері сахналанды. Сондай-ақ, «Дала рухы» ансамблінің концерттік бағдарламасы көпшілік назарына ұсынылды. Сонымен қатар, «Этноауыл» аумағында ұлттық ойындардан (қазақша күрес, қол күрес, садақ ату, ләкәш, асық ойындары, гір тасын көтеру, аударыспақ, тоғызқұмалақ, қойшы ойыны, сақпан ату, ләңгі тебу, арқан тартыс, арқаласпақ, т.б.) сайыстар өтті.
Сауран ауданының мәдени күндері «Керуен Сарай» кешенінде Гала концертпен қорытыланды. Кешкі шараға Сауран ауданы әкімінің орынбасары Ербол Жанғазиев қатысып, игі лебізін білдірді.
Сауран ауданы өнерпаздарының және «Алдараспан» театрының әртісі Нұржан Төлендиев және эстрада жұлдыздары Нұржан Қалжан, Бақытжан Мұстафаев, Данияр Барыстың қатысуымен мерекелік Гала-концерт тамашаланып, түркістандық жұртшылыққа көтеріңкі көңіл күй сыйлады.
